ندى خبت كوب الشاي ورا ضهرها.
حماتي قالت بسرعة
صرفناهم في حاجة ضرورية.
ضرورية لمين؟
سكتوا.
وفي اللحظة دي…
موبايل ندى نور.
كانت واقفة قريبة مني، وقدرت أشوف الرسالة على الشاشة قبل ما تخبيه.
تم خصم 188000 جنيه من بطاقتكم المنتهية ب
جهة التحصيل قاعة أفراح ڤيو جاردن.
3
ندى خدت بالها، فقلبت الموبايل بسرعة وضمتّه لصدرها.
لكن الست المشترية كانت شافت الرسالة هي كمان.
بصت لهم بصدمة.
إنتوا أخدتوا عربون شقتنا ودفعتموه في فرح؟!
حماتي وقفت قدام ندى كأنها بتحميها.
بنتي بتتجوز مرة واحدة في العمر! دفعنا حجز القاعة، فيها إيه يعني؟ بكرة تستلموا الشقة وحقكم مش هينقص جنيه.
الراجل المشتري اتعصب.
إحنا بنشتري شقة علشان مستقبل ابننا ومدرسته! مش بندفع تمن منظرة بنت حضرتك في فرحها!
حتى السمسار وشه اتغير.
قرب من أحمد وقال بصوت واطي
يا أستاذ أحمد، الكلام ده ما اتقالش من الأول. حضرتك أكدتلي إن الملكية سليمة وإن كل أفراد الأسرة موافقين.
أحمد كان واقف وسطنا وكل العيون عليه.
وأخيرًا رفع عينه وبصلي.
مريم… خلاص الموضوع وصل لكده. مضي التفويض الرسمي ونخلص. الشقة اتباعت بالفعل، وناخد باقي الفلوس ونبدأ حياتنا من جديد.
بصيتله بعدم تصديق.
نبدأ من جديد؟
نزلت إيد شنطة السفر.
أحمد… إنت سامع نفسك؟ إنت مدرك إنت بتقول إيه؟
قال بسرعة
أنا عارف إنك اتظلمتي شوية. بس أمي كبرت في السن، وطول عمرها شايلة مسؤولية ومتهنتش في حياتها. وندى داخلة على جواز، وأهل خطيبها ناس بيهتموا بالمظاهر جدًا. مينفعش نخليهم يبصوا لأختي نظرة قليلة.
بصيتله كام ثانية.
وبعدين قلت
يعني علشان محدش يبص لأختك نظرة قليلة…
قررتوا إن أنا اللي أبقى قليلة في نظركم؟
بصلي أحمد وكأنه أول مرة يسمع السؤال بالشكل ده.
فتح بقه علشان يرد، لكن أمه سبقته
يا بنتي بلاش دراما! محدش قال إنك قليلة. إحنا عيلة واحدة، والفلوس كلها في الآخر راجعة للبيت.
ضحكت.
أنهي بيت يا سعاد؟
بصتلي باستغراب.
نعم؟
قفلت شنطة السفر ووقفتها جنب الحيطة، وبعدين بصيت للسمسار وللراجل ومراته.
حضرتكوا دفعتوا 200 ألف جنيه عربون، صح؟
الراجل قال بعصبية
أيوه.
وعندكم إيصال بالتحويل؟
مراته طلعت الملف بسرعة.
طبعًا عندنا.
والعقد اللي مضيتوه مع أحمد موجود؟
موجود.
هزيت راسي.
تمام. محدش يمشي.
أحمد اتوتر.
مريم، إنتِ ناوية تعملي إيه؟
حاجة كان المفروض أعملها من زمان.
طلعت موبايلي واتصلت برقم.
أحمد حاول يقرب مني.
بتكلمي مين؟
بعدت عنه.
صاحب
الشقة.
الصالة كلها سكتت.
حماتي رمشت كذا مرة.
صاحب إيه؟
بصيتلها.
صاحب الشقة.
ندى ضحكت بسخرية.
هو إنتِ اتجننتي؟ ما إنتِ صاحبة الشقة!
لأ.
الضحكة اختفت من على وشها.
أحمد كان الوحيد اللي ما اتكلمش.
لكن وشه قاللي إنه بدأ يحس إن فيه حاجة غلط.
بعد ثواني، حد رد عليا.
ألو يا أستاذ فؤاد؟ آسفة إني بكلم حضرتك فجأة، بس عندنا مشكلة في الشقة… وفيه ناس موجودين هنا دلوقتي بعقد بيقول إن الشقة اتباعت لهم.
سمعت صوته العالي من السماعة
اتباعت؟! مين اللي باعها؟!
بصيت لأحمد.
جوزي.
صوت الراجل اتغير تمامًا.
مريم، أنا جاي حالًا. محدش يتحرك من الشقة، ومحدش يلمس حاجة.
قفلت المكالمة.
حماتي كانت باصة لي ووشها مش فاهم.
مين فؤاد ده؟
فؤاد المنشاوي.
السمسار اتدخل
مين فؤاد المنشاوي؟
قلت بهدوء
المالك الحقيقي للشقة.
الراجل المشتري شهق.
مراته حطت إيدها على بقها.
السمسار بص لأحمد وكأنه هيهجم عليه.
إنت قلتلي الشقة ملك مراتك!
أحمد بصلي.
مريم… إنتِ بتقولي إيه؟
لأول مرة من ساعة ما دخلت الشقة، حسيت إني مش محتاجة أرفع صوتي.
بقول إن الشقة دي إيجار.
حماتي صرخت
كدابة!
لفيت ناحيتها.
إيجار يا سعاد.
مستحيل! إنتِ قولتي إن أبوكي سايبها لك!
أنا عمري ما قلت كده.
أمال شقة الجهاز اللي أهلك جابوهالك دي إيه؟!
إنتِ اللي سميتيها شقة الجهاز. وإنتِ اللي كنتِ بتقولي للناس إنها ملكي. وأنا عمري ما صححتلك المعلومة.
أحمد قرب مني خطوة.
استني… يعني إيه إيجار؟ إحنا متجوزين بقالنا 3 سنين وأنا معرفش؟
بصيتله في عينه.
وإنت عمرك سألت؟
سكت.
أول ما اتجوزنا قلتلك إن الشقة متاحة لينا من طرف عيلتي، وإن أنا المسؤولة عن عقدها ومصاريفها. إنت افترضت إنها ملكي. وأمك افترضت إنها ملكي. وأختك افترضت إنها ملكي.
ندى قالت
بس إنتِ ما قولتيش إنها إيجار!
وإنتِ كان لازم تعرفي ليه أصلًا؟
اتخرست.
كملت وأنا باصة لأحمد
كنت ناوية أقولك التفاصيل لما أحس إننا فعلًا بقينا أسرة واحدة. لكن بعد شهرين من الجواز، أمك دخلت تعيش معانا من غير ما تسألني. وبعدها ندى. وبعدها بدأتوا تتعاملوا مع كل حاجة تخصني كأنها حق مكتسب.
أحمد مسح وشه بإيده.
طب… وإيه موضوع ال مليون و ألف؟
السمسار بصله بحدة.
ده السعر اللي حضرتك عرضت بيه الشقة يا أستاذ أحمد!
أنا ضحكت.
يعني إنت حتى سعّرت حاجة مش بتاعتك؟
حماتي ضربت كف على كف.
يا نهار أسود!
الراجل المشتري مسك أحمد من قميصه.
رجعلي فلوسي حالًا!
السمسار دخل بينهم بسرعة.
استنى يا أستاذ، إحنا لازم نفهم الأول.
نفهم إيه؟! الراجل باعلي شقة إيجار!
مراته بدأت تعيط.
إحنا فسخنا عقد الشقة القديمة! والمدرسة طلبت إثبات سكن في المنطقة!
بصيت لها، وحسيت إن غضبي من أحمد ما ينفعش يخلي الناس دي تدفع تمن غلطته.
قلت
حضرتكوا حقكم هيرجع. بس لازم كل حاجة تتثبت رسمي.
أحمد بصلي برجاء.
مريم، بلاش شرطة.
حماتي صرخت
شرطة إيه؟! هو قتل حد؟ سوء تفاهم وخلاص!
بصيتلها.
تزوير توقيع، استخدام بطاقتي من غير إذني، فيديو اتصور بالخداع، بيع ملك الغير، وأخذ عربون من مشترين.
وبصيت لندى.
وصرف الفلوس في فرح.
ندى بدأت تعيط.
أنا معرفش! ماما قالتلي الفلوس من أخويا!
حماتي لفتلها بسرعة.
اخرسي يا بت!
في اللحظة دي جرس الباب رن.
فتحت.
كان الأستاذ فؤاد.
